كل ما تريد ان تعرفه عن الكحـة
لازم نعرف الاول ايه هي الكحة؟؟
هي عباره عن رد فعل reflex لخروج الهواء من الرئيتين لتنظيف المجري التنفسي من اي افرازات او مخاط متراكم
الله !! طب ما الكحه ليها فوايد اهوه ياجودعان
مبدئيا كده فيه كام معلومه حابب اقولها
اي كحه بنعالج سببها ودا اللي هنتكلم عليه حاليا ،،وموضوع مهدئات الكحة اللي عمال علي بطال دي ملهاش لزمه لانها ممكن تسوء حالة الطفل بالفعل لاننا بنكون محتاجين الطفل يكح علشان يطلع كل الافرازات اللي في صدره ومهدئات الكحه بتتعارض مع الكلام ده.
*غالبا الكجه بتبدي ناشفه dry وبعد كده بتقلب بمخاط productive عادي
*الكحه اياً كان سببها اقل وقت بتاخده اسبوعين دا اللي ربنا كرمه كمان ...المهم الطفل يتعايش معاها بمعني انها لا تؤثر علي نشاطه و مجهوده ولا تصحيه من النوم
*السوايل الدافيه والعسل والميه من اهم مذيبات البلغم علميا وبتساعد علي تحسين الكحه
*اوقات كتير الكحة بتكون مصحوبة بترجيع gag reflex ودا طبيعي وميقلقش
*ممنوع الادويه المذيبه للبلغم قبل سن سنه الا في الضروره الطفل لسه مفيش عنده قوه للكحه في انه يطرد بيها البلغم ..فساعدتك بدوبي البلغم وبتغرقيه فيه بس اه والله
*الادوية الطارده للبلغم لا تفضل قبل سن سنتين (بتهيج) الكحة اكتر
*اخيرا والذي رفع السماء بلا عمد
الطفل لابيتعود علي الجلسات ولا هيعيش طول عمره علي البخاخات لو اخدها...
نروح بقي لاسباب الكحه
*كحه+رشح خفيف+ الطفل اكتيف= دور برد
*كحة+رشح فظيع اكتر من ١٠ ايام ومناخير مقفوله= حساسية انف
*كحة مخنوقه وصوتها غريب ومزعج= خُناق (التهاب في الحنجره)
*كحة ليليه او الصبح بدري مع الترجيع وبشكل متكرر +تزييق في الصدر= حساسية صدر (بشروط هيتم ذكرها)
*كحة+ نهجان + حراره= التهاب شُعبي حاد او التهاب رئوي
*كحة ليليه غالبا+ مع اعراض جهاز هضمي وترجيع = ارتجاع في المريء GERD
* كحة قويه علي شكل نوبات بتيجي والنفس بيُخرج وبعدها صوت شهيق عميق زي صوت الديك= السعال الديكي
*فجأة الطفل كح بطريقه غريبه وكان كويس قبلها= بلع جسم غريب زي (قشر اللب- الفول السوداني) اشهرهم
*كحة لها علاقه بلبس او مكان معين او وقت معين في السنه = كحة تحسسيه allergic cough
نتكلم عن الاهم كعلاج:
١- حساسية الانف
- ودا غالبا بيكون في دخلة الربيع وفصل الشتا كله والام بتشتكي ان ابنها عنده برد صيف شتا وبيعطس اووفر وبيهرش في نوزه كتير
-ودا لازم نفرق بينه وبين لحمية الانف بالفحص....لان اللحميه لو موجوده وكبيره يفضل انها تتشال.
علاجها:
قبل اي حاجه ابعد عن اي مُسببات زي العطور والروايح النفاذه والدخان والاتربه وبلاش مسح الانف بمناديل معطره وبلاش نفرش سجاد اوووفر في البيت والفرش والمخدات يكون ليهم cover ونبعد عن اي حاجه فيها فرو وبلاش حيوانات اليفه في البيت الله يكرمك..والتهويه مطلوبه ...وبلاش نخرج لو الجو فيه تراب ولو خرجنا لازم يغسل راسه وايديه والام بلاش تنشر هدوم الطفل اللي عنده حساسيه في الهوا برا....علي فكره الاكل ملوش اي علاقه بحساسية الانف
نروح للعلاج
اولا مضادات الحساسيه
زي
zyrtec- telfast
ثانيا بخاخات الانف الموضعيه اللي بتحتوي علي كورتيزون
زي nasonex- rhinocort-flixonase
ودي مسموحه من سن سنتين وفيه ناس بتستخدمها من سن سنة
الاخت اللي هناك واتفاجأت لما قول كورتيزون .....لا ياستي الموضعي مفيش اي قلق منه دول كمان بيعطوه للطفل كوقايه ...
*ولو قبل سنه والكلام ده للدكاتره يبصوا ع اللينك ده
نروح للوقاية
اولا بخاخات الكورتيزون اللي ذكرناها
او بخاخات تحتوي علي sodium cromoglycate
زي nasotal -zalestin
ودا ممكن استخدامها من ٣ شهور ل ٦شهور حسب التحسن
ثانيا
مادة montelucast ودي بتزود قوة مناعة الجهاز التنفسي
يعني مش اي فيروس او بكتيريا او مسبب حساسيه يقدر يتعامل معاها
زي : سينجولير وليبيل
ودي جرعته
من ٦ شهور لسنتين : كيس ٤ مجم علي معلقة زبادي او تفاح مهروس او بطاطس مهروسه قبل النوم
ولازم الكيس يتاخد في خلال ١٥ دقيقه من تحضيره
من سنتين لخمسه: قرص مضغ ٤ مجم مساءا
اكبر من كده قرص ١٠ مجم مضغ مساءا
ودا برده من ٣ شهور ل ٦شهور
٢-النزلات الشعبيه
التهاب_الشعب_الهوائيه_الكبيره_bronchitis
-بيكون الطفل معاه حراره وكحه بمخاط وترجيع بعد الكحه
علاجه
- اهمهم موسع الشعب
زي : فنتولين او ايرونيل ودا افضلهم
ومينوفللين واخواته وكل بالجرعات المحدده من الطبيب طبعا
والافضل طبعا استخدام جلسات نبيولايزر وهتكلم عليها بالتفصيل في اللي جاي
-بندي دوا ( اعشاب ) بيساعد علي خروج البلغم واذابته زي
بنتامكس او فاست شراب
- خافض حراره
باراسيتامول او ايبوبروفين
ولا يفضل اننا نستخدم مضادات الهيستامين الجيل الاول زي (فنيستيل) علشان بتقلل خروج البلغم ويتنشفه جدا جدا
- المضاد الحيوي هنا ملوش قيمه لان الدور غالبا فيروسي الا اذا
الاكتيفيتي والشهيه بتاعة الطفل قلّت او رضاعته قلّت
-الكحه هنا هتاخد وقت لا يقل عن اسبوعين ...احنا محتاجين الطفل يكح علشان يطلع الافرازات والكحه هتتحسن تدريجي وموسع الشعب هنا ضرووري جدا حتي انتهاء الكحه
التهاب_الشعب_الهوائية_الصغيره (القصيبات )bronchiolitis
-اكتر مرحله معرض ليها الطفل اقل من ٦ شهور ومع الطفل حتي سن سنتين وسببها فيروسي
-الطفل بيجي بحراره وصعوبه في التنفس (نهجان) ومش قادر يرضع وكحه شديده
-بعد الفحص الدكتور بس هو اللي بيحدد تبعا لصعوبة التنفس هيتعالج في البيت ولا في المستشفي...وياريت لو الدكتور قال مستشفي بلاش بقي موضوع نجرب ونشوف ..اصل ليه اخوات ومش هعرف اتحجز بيه كلام ملوش لازمه طبعا
- خلينا في علاج البيت
+السوايل اهم حاجه hydration وممكن نستخدم محلول الجفاف
+جلسات استنشاق موسع شعب
*فاركولين نقطه لكل كجم ويفضل من بعد سن ٦ شهور
*قبل سن ٦ شهور الاتروفنت فيه منه تركيز ٢٥٠ و ٥٠٠
* كمبوفنت combivent فيه منه تركيزين ربع ونص
ودا عباره عن الاتنين مع بعض وفعال جدا جدا
+جلسات كورتيزون استنشاق
*بالميكورت pulmicort فيه منه تركيزين ربع ونص
وممكن تتعمل لوحدها او في نفس جلسة الموسع للشعب
ودي بتحدد من خلال الطبيب اذا كان محتاجه ولا لا
محلول الملح او الميه المقطره ثابت من ٢.٥ : ٣سم
٣-حساسية الصدر
ودي لازم يتوافر فيها ٣ اشياء
*التهاب شُعبي اكتر من 3 مرات
*استجابه فعاله لموسعات الشعب
*حد في العيله عنده حساسية صدر او انف او عين او جلد ومن اي درجة قرابة ان شالله يكون ابن عم بنت خال ابو ابوه
*زمان كان صعب نفرق بين Bronchiolitis والحساسيه غير بعد ٣ مرات التهاب شعبي بس الكلام الجديد ان فيه حساسية قبل سن سنه asthma below 1 year.. وتشخيص الحساسية لا يستلزم غير التكرار والاستجابة لموسعات الشعب
* العلاج
تبعاً للحالة فيه صعوبة تنفس ولا لا وهيحتاج مستشفي ولا لا واللي بيحدد الدكتور طبعا
خلينا في علاج البيت
-ابتداءا من جلسات الفاركولين والبالميكورت من ٣ :٦ مرات يوميا
وتم ذكرها فوق بالتفصيل وطبعا عدد الجلسات بيقل تبعا للتحسن
-البخاخات
-بخاخات موسع شعب
زي فنتولين او فنتال
-بخاخات الكورتيزون
زي فليكسوتيد والفيسكو
- الاتنين مع بعض
زي seretide - symbicort
ودي من بعد ٤ سنوات فقط
ونرجع تاني نقول البخاخات او جلسات الاستنشاق دا احدث علاج علي مستوي العالم 2015
-غالبا الحساسيه بتفضل حتي سن ٦ سنوات
الوقايه:
بياخد جرعة من بخاخة الكورتيزون كل يوم صباحا من شهر ل ٣ شهور زي فليكسوتيد او جلسة بالميكورت
-سينجولير واخواته زي ماشرحنا فوق بالظبط
وطبعا الحساسية موضوع كبير فهنتكلم عليه بالتفصيل في بوست منفصل ان شاء الله
4-السعال الديكي
علاجه
-مضاد حيوي (azithromycin او erythromycin )
- سوايل دافيه كتير
- مهدئات كحة
5-بلع جسم غريب
لابد من عمل منظار رئوي لاستخراجه ودا بيتعرف من خلال كلام الام عن الهيستوري